Os pequechos do Daría

A HORTA DO DARÍA  A nosa horta segue a medrar... Xa vos contamos con que ilusión comezamos a sementeira de todo tipo de hortalizas e verduras neste curso. O que non esperabamos é que en tan pouco tempo, todo o que prantamos medrara deste xeito. Chícharos, leitugas, repolos, allos, cebolas, tomates, patacas, cabazas, etc. están a encher a nosa horta de cor. Nós, quitamos as malas herbas, regamos, puxemos canas aos chícharos, ata prantamos amorodos silvestres que atopamos nas nosas andainas diarias...  Pero pagou a pena todo o esforzo, mirade que marabilla de horta ten o Daría!!!

  EXPERIMENTAMOS... Co gallo da chegada da primavera, levamos a cabo o primeiro dunha serie de experimentos baseados na cor. A este primeiro experimento titulámolo: "pingas máxicas".  Precisamos: aceite, leite, colorantes alimenticios, goteiros  e unha bandexa fonda. E sobre todas as cousas, moitas, moitas, ganas de aprender de xeito divertido. Nerea tamén se apuntou ao xogo! Botamos un bo chorro de aceite na bandexa e  por outra banda, mesturamos diferentes cores de colorante alimenticio con leite.  Mirade que choiva de cores!!!

  Este venres desfrutamos no cole dunha xornada de "romería" para celebrar o día das Letras Galegas. Merendamos todos xuntos na arboleda que hai na cidade infantil Príncipe Felipe.  Sustituímos os bocatas por empanada, tortilla e bica. Bailamos ó son da música galega e das cantareiras e participamos nun circuito de xogos moi divertido.

  Este martes visitamos o Museo de Pontevedra. Puidemos desfrutar da historia da "Bruxa Grandía", a partir da interacción con diversas obras do museo, que tiñan relación coa historia da bruxa das cores.  Con cada unha delas, a bruxa vivía unha emoción e descubría unha cor.  Observamos, atentos, as distintas obras, para entender a historia e rematamos nun obradoiro dándolle cor nós mesmos a este conto. Despois de merendar tranquilamente na Ferreiría, marchamos para A Fundación, onde vimos unha obriña de teatro chea de música.

  Dende que chegou a primavera, estivemos inmersos en multitude de actividades e propostas moi divertidas e didácticas: coñecimos os nomes de diferentes flores, aumentando o noso vocabulario (algunhas delas incluso as atopamos nas nosas andainas nos arredores do cole), coloreamos, pintamos, creamos cadros de flores con diferentes técnicas artísticas,  escribimos sobre as flores, aprendimos rimas e poesías desta estación...fixemos marcapáxinas con motivos florais, decoramos as xanelas con flores e bolboretas....incluso tivemos e temos algunhas destas flores e prantas na clase.